Lee: Gen Min Aung Hlaing Hi Taza Cawi Awk A Tlak

UN palai, Ms Yanghee Lee nih Kawlram ralkap bawizik Gen. Min Aung Hlaing cu taza cuai awk a tlak, sualphawt i azizut a hau tiah Bangladesh ram a va kalnak i thawnglatu pawl hna he tonnak an ngeih lioah a chim.

Ms Yanghee Lee nih mah bia a chimnak cu naitan Thailand ram le Bangladesh ram i Rohingya ralzam pawl a va ton hna hnu ah Gen. Min Aung Hlaing he pehtlai in a hmuh ning a chimmi a si.

Gen. Min Aung Hlaing nih Kawlram chung nuhrin covo phung a buar, Rohingya cihmih an timhnak hna, mah kong vialte zong amah cungah aa hngatchan dihmi lawngte an si tiah vawleipi theih awkin Ms Yanghee Lee nih Gen. Min Aung Hlaing kongah a voikhatnak bia a chim.

Nikum Bangladesh ram i Rohingya ralzam pawl dornak hmun ah UN palai pawl an rak kal lio ahkhan Kawl ralkap nih an thahnawnnak hna kong, an sersatnak hna kong le an duh paoh in Rohingya nu pawl an tuahto hnanak kong pawl cu a rak chim hna tikah Gen. Min Aung Hlaing le a dang ralbawi sang minung 5 hna cu phung ning tein sual kan phawtpiak hna uh tiah UN ah an rak aupi bal cang hna.

Cucaah a tu i Rohingya ralzam kirternak kong khua an khanpiakmi hna zong ahhin ralzam an kir hlan ah phung buartu a simi hna ralkap pawl le ninglo canglo in Rohingya tuahtotu a simi hna kha sual an phawt hmasa hna i dantatnak an rak pek hna hmasa awk a si.

Mah cu lo ahcun Rohingya ralzam pawl an umnak thing ah kir than hmanh hna sehlaw, a hlan an tuahto hna ningkel in pei an tuahto than ko hna lai cu tiah Ms Yanghee Lee nih a chim.

Cucaah, Ralkap bawizik Gen. Min Aung Hlaing telh in Rohingya thattu a simi, serhsattu a simi, nu pawl tlaihhremtu a simi Kawl ralkap pawl hna kha sual an phawt hna i dan an tat hmasa hna awk a si tiah a ti.

VOA

Be the first to comment on "Lee: Gen Min Aung Hlaing Hi Taza Cawi Awk A Tlak"

Leave a comment

Your email address will not be published.


*