Aung San Zuk A Cuangmi Phaisa Ser A Si Cang Lai

Kan Kawlram phaisa cungah Buchoh Aung San zuk/hmanthlak a cuangmi phaisa a rau hlan ah chuah a si cang lai. A nithla tu cu a fian rih lo caah kan thei kho rih lo tiah Bahhu Ban (ဗဟိုဘဏ္) lutlai changtu a simi U Bo Bo Nge nih a chim.

U Bo Bo Nge nih mah bantukin a chim hi Feb 6 ah tuahmi Bahhu Ban kong he pehtlai in thawngfianhnak an tuahnak hmun i biahalnak an tuahmi ah a lehmi hna a si. Buchoh Aung San zuk cuang in phaisa cu kan ser ko lai, a rau tuk ti lai lo. A si nain, a ni dikthlir tu cu kan hngal rih lo tiah a ti.

Buchoh Aung San zuk cuang in Kawlram phaisa ser ding timi cu 2013, Nov 13 i rak tuahmi Pyituh-Hluatdaw ton/biaruahnak an rak tuah lioah khan biatung an rak dirh cangmi a si. A si nain, Bahhu Ban lei nih a rak timi hna cu phaisa tlap a hlei in ser ding kan si ahcun ram hruaitu min thang a simi hna, ram chungah sakmi minthang inn pawl hna, hmun dawhdawh le pangpar dum dawhdawh kan ngeihmi hna tbk in a nilecan he aa tlak ningin cozah he hnatlaknak ngeih hnu ah phaisa thar cu ser si te ko seh tiah an rak leh hna.

Kum 1988 hnu in Buchoh zuk a cuangmi phaisa cu a thar in ser a rak um ti lo, asinain Ketharaja Chiandeih siangpahrang zuk tu cu phaisa cung cuang zuk ah rak cuanter a si.

Mah kong he pehtlai in comment tuahtu tampi hna nih kan ram phaisa cung i saram zuk te hna an cuanter hi cu kan tenau tuk tinak a si an ti. Cun a cheu nihcun Buchoh Aung San zuk cuanter ding a si ahcun kan ram phaisa man hi kaiter/santer a hau tiah an ruahnak a chuah cio.

Be the first to comment on "Aung San Zuk A Cuangmi Phaisa Ser A Si Cang Lai"

Leave a comment

Your email address will not be published.


*