Philippines Ram, Abu Sayyaf Ralhrang Nih Malaysia 1 Le Indonessia 2 Cu Thah Dingin An Tlerh Hna

Philippines ram, Mindanau ramthen ah hram a bunhmi Abu Sayyaf hriamtlaibu ralhrang pawl nih Malaysia rammi minung pakhat le Indonesia rammi ngatlai minung 2 hna cu thah dingin an hren hna.

An nun himnak man nan kan pek lo a si ahcun an hngawng kan tan hna lai tiah tlerhnak an tuahmi hna cu video in an thlak. Mah cu minung 3 thah ding tlerhnak an tuahmi hna video cu February 14, 2019 ahkhan Kim Hundin timi min hmang Facebook chungah zinglei suimilam 5 Am ah an rak tar.

Abu Sayyaf ralhrang pawl nihcun an tlaihmi hna minung 3 cu an ram uktu hna sinah rak kan bawm hram ko uh tiah bawmh an halter hna. Indonesia rammi minung 2, an hmai an huhmi hna cu Heri Ardiansyah (kum 19) le Hariadin ( kum 45) an si theu lai tiah an zumh hna.

Nikum Dec 5, Nichuahlei Sabah rili Sandakan ngatlaihnak hmun ah nga tlai dingin an rak kal lioah Abu Sayyaf ralhrang nih an rak tlaihmi hna an si. (Mah cu hmun cu Philippines ram, Tawi Tawi tikulh he aa naihnak teah a ummi a si).

Abu Sayyaf hriamtlai pawl nihcun Malaysia pa an tlaihmi i a nupi simi Nadin Junianti Abdullah cu Feb 11, zanlei suimilam 7 Pm hrawngah khan Journalist pawl phone number kan pe tiah an rak hal. Cun atu tiangah Malaysia nawlngeitu hna zong nih na pasal luatnak kongah zeihmanh an chim bal lo caah na pasal hi harnak fak a tong kho tiah an rak tlerh.

Nadin nihcun atu hi ralhrang nih ka pasal luatnak kongah voi 2nak an ka chawnh a si cang caah ka pasal himnak cu ka bawm ko uh tiah Malaysia nawlngeitu hna cu  nawl hna.

A si nain, Sabah palik bawizik a simi Datuk Omar Mammah nihcun Philippines ram ralhrang dohtubu hna he hmunkhat ah an hrenmi hna an luat khawhnak hnga rian kan tuanti ko tiah a chim.#TSO

Be the first to comment on "Philippines Ram, Abu Sayyaf Ralhrang Nih Malaysia 1 Le Indonessia 2 Cu Thah Dingin An Tlerh Hna"

Leave a comment

Your email address will not be published.


*