Ralzam Caah US Ram Luh A Khamtu Thil Phunkhat

Ralzam, US ram ah kan luh khawhnak dingah khamtu thil tampi lakah thil pakhat a kan dawntu le a kan khamtu thil a si vemi hi kan theih ah a tha ngai ko tiah ka ruah.

US ram hi a liam cia june 27,2019 ah Chigaco airport kan phan. Case tlaitu nih an kan don i cu kan case tlaitu pa cu minak ( Rohingya ) pa asi. Ngamh tlak ngai in bia kan i ruah lio ah phone an van call. Phone cu mawtaw chung in asi caah speaker a thanh i thil a cang mi cu fiang ngai in ka van theih.

Cu thil cu ralzam tampi US ram kan luh nak dingah hin dawntu thil tha lo ngaimi cu asi. Phone an i chawnh dih in zaang tlung lo ngai in atu na theih bantuk khan US ram ah ralzam nih tihin a ummi kan tamtuk caah ralzam latu thinlung a zor tuknak asi tiah hmaichia ngai in a chim.

Cucu minak hna chung an si i, an pa nih hin tha tein rian attuan i a chungkhar cu phaisa a hmuhmi a pek hna i a cawm ko hna. Sinain niruk zan le sunday zan ah inn dangah a riahtak tawn hna. Inn a rak lawi tikah an nu nih innka a awnh duh ti lo pinah palik a chawnh hna i cuticun buai ngai in an um.

An pa nih a ti vemi cu an paw ka cawm hna ah za lo maw? tiah zalong ngai in bia a chim ve. Cu bantuk cu le a dang tampi chungkhar thennak buainak nihcun cozah le ralzam latu, bawmtu buu hna cu an lungthin a zorter ngaingai hna nak hi a rak si ve.

A hlei in, cu chungah cun minak paul ( Rohingya ) hna hi an tam khun. Mah ruangah, Malaysia (ramhnihnak) ah aa tthi-ummi nuva paoh cu OPE an phit cang zongah nuva file thennak ( split case ) an rak kan tuahtermi kha a rak si.

Atu thonginn ahhin nu le va kar buainak, chungkhar buainak tuah ruangah kuat dingmi tampi an um tiah case tlaitu pa nihcun lungtha lo ngai in a chim. Cu chungkhar buainak, then hmalnak ruang ahcun file thennak (split case) tuahmi paoh kha US phakka bakin case tlaitu hna nih ttha tein biakamternak tuahter a si. Kan i then bak lai lo tiah min zong thutter a si.

Mah cu thut lio zong ahcun tha tein chim uh, min nan thut hnu i nu va karlak ah buainak a um ahcun a si kho lai lo hih tiah biahrennak tha tein tiam ta a si rih. Cozah le ralzam zawnruattu, bawmtu hna nih an ram caah thatnak lei chuahpitu siloin mihnahnok le innpa caah buainak chuahpitu kan si tikah an lung kan dong ngaingai.

Cucaah ralzam dang van lak than le an ram ah van luhter than ding hi cu an caah thilhar ngaingaimi pakhat ah a cang ko cang. Kanmah Laimi chung zong hmanhah hin kan tthatnak nakin kan chiatnak hi kum khat hnu kum khat in hmuh deuhdeuh a si tikah hin ralzam thar an ram ah luhter rih ding hi cu thil har ngai a si cang ko lai.

Catialtu: Pastor Stanley Ngun Su

Be the first to comment on "Ralzam Caah US Ram Luh A Khamtu Thil Phunkhat"

Leave a comment

Your email address will not be published.


*