Lai Online Chung Catialtu Hna Nih Kan Biaknak/Zatlang Nunphung Dirpi A Hau

Lai media, online in thawngpang thlah, catial le post  nakin phaisa hmuhnak rian a tuanmi a tam u hna hi, an profile min le hmanthlak ahkhin nu min le nu hmanthlak deuh lawngte an si hna. Nu an van sitak, le an va sitak lo cu va um rih sehlaw.

A tam deuh cu dawhcah lo video, tawlawng deuh a simi nu pawl hmanthlak a thur deuhmi rumro lawngte tar le post a si tikah ca rialtu mipi caah tthnemnak a um lem lo piin kan bianak le zatlang nunphung he aa kal ngaingai.

Mah hnu kum tlawmpal ahcun hi nakin an zualhma deuh te lai ti cu a fiang pah ko. Zeicatiah laimi nih website le online in catial/post kan hmannak hi zei canpi hmanh a rau rih lo.

Mah bantukin aa dawhcah lomi video le hmanthlak tar le post hi a ngaingai loah cun (Prostitution) hlawhhlang riantuan phunkhat a si ti hi kan fian a hau.

Zeicatiah, Bible ca nih dawhcah loin nun khuasak timi le aa dawhcah lomi thil tuah paoh cu hur duhcuai  le hlawhhlang riantuan phun ah a chiahmi a si kha thei hram hna usih law a tha hnga.

Facebook hmang laimi a tam deuh nih carel ngai an zuam lem lo tiin, a thurhnawmmi ramdang hmanthlak le video lawngte tar hi cu t’han tha in t’hanchonak cu a si rua lai lo, mino le hngakchia lam pialpitu le tumchuknak a chuahpitu a si deuh men lai.

Ramdang media pipa lo deuh pawl nih an duhtawk in a thurhnawmmi video le hmanthlak an tarmi/postmi khi Lai media nih an nawl kan i cawn ve awk a si lo.

Zeicatiah, kan nih Laimi cu biaknak le nunphung dawhte zong a ngeimi kan si hna caah kan biaknak, kan miphun le caholh, le kan zatlang nunphung hna hi fek tein kan dirpi peng a hau ko.

Thawngpang, biazai, capar, forhfialnak le a dangdang a tha deuhmi rel awk tete, asiloah Pathian bia tibantuk pawl hna khi a tam deuh in post kho hna usih law a tha deuh ko hnga lo maw…..

Nawlnak,

Ahohmanh thinhung lo tein,

Chin Modern News