Kabul Hotel Thahnawnnak In A Thimi Minung 22 Chungah US Rammi 4 An i Tel Ve

Kan hnung, Zarhteni (Jan 20) ahkhan Afghanistan ram, Kabul khuapi i a ummi hotel pakhat zanriah rawl a ei liomi khualtlung pawl hna cu ralhrang nih an luhhnawh hna caah a tlawm bik minung 22 an thi.

Kabul hotel ah thahnawnnak a tuahtu hna cu Taliban ralhrangbu an si. Hriamtlai minung 6 hna nih an taang ah bom cu an hrukchih i ramdang mi hna le Afghan cozah riantuantu pawl thahnawnnak tuah dingah hmuitinh ngei tein an luhhnawh hnami a si tiah Afghan nawlngeitu hna nih an langhter.

Ralhrang pawl cu hotel chuangah cun khan khat hnu khan khat in an lut i an hmuitinhmi hna kha an kah hna. Ramdang mi hna kha an ral khun hna caah a cheukhat hotel khan pawl cu an lanhtakmi zong a um tiah mit in hmutu a simi hna nih an chim.

Mah Taliban ralhrang nih thahnawn an tuahnak in a thimi minung 22 hna chungah hin US rammi minung 4 an itel i minung 2 zong nih hliamhma an tuar tiah State Department nih an fehter.

Kabul Hotel thahnawnnak in a thimi dihlak chungah ramdangmi minung 14 an si. Ukraine rammi minung 6, KamAir vanlawng mawngtu Venezuela rammi 2, Kazakhstan minung 1 le Germany rammi 1 an si hna tiah nawlngeitu hna nih an langhter.

Fox News

Comments are closed.