A luan ciami kum 10 lioah, Australia ram a rak pemmi nuva hna nih an ngeihtharmi fanu te cu a cuarpar tan piak dingah a thli in ramleng chuah an i tim nain Australia cozah nih an kham manh hna.

Australia ram ahcun nu cuarpartannak FGM (Female Genital Mutilation) cu ram chungah siseh, ram lengah chuahpi i va tan zongah siseh an ram phung nih a onh lomi a si.

Australia phung nih nu cuarpartan timi cu (akin sexual abuse) timi phungbuar phunkhat ah an chiahmi a si. Zeicahtiah, nu cuarpartan nih hin nu hna i an ngandamnak lei he aa pehtlaimi ah that lonak tampi a chuahter tiah an ti.

1. Cuarpar an tannak thi chuahnak in thihnak tiang a chuahter khotu a simi rungrul a lut kho, cun an hmanmi belet in HIV zawtnak zong i chawnh khawh a si.
2. Zun zunnak lam zong ningcang tein zun nih a kalpi khawh thitha lo tikah zunthil (tutuhlut) tiang in zawtnak a chuahter khawh.
3. Fa ngeih harnak zong a chuahter khawh, nu nih phung an hngalh tikah an thi chuahnak he aa pehtlaihnak kha a khalter deuh caah pang faknak an tuar.
4. Fa an ngeih caan ah siseh nupa sinak tuah caan ah siseh hawi hlei in an tuar khun.
5. Cun thinlung le ruahnak lei zongah a chambau deuhmi ah an i chuah tiah dothlatnak tuahtu doctor thiamsang hna nih an langhter. (Orchid Project)

Mipem a simi nuva hna nihcun fa an ngeihnak siin in an chuah lai ah an pa nih anmah holh in an fa chuakka a simi nute cuarpartannak kong phon in midang he an i chawnhmi cu record an rak tuah piak hna.

Palik nihcun holhlettu an lehter hna hnu ah, nuva hna cu biaceihnak zung ah an chuahpi hna. A si nain, an pa nihcun kanmah fanu cuarpartannak kong kan chimmi a si lo, kan hawinu fa kong ka chimmi a si tiah a ti.

A si nain, palik nih dothlatnak an tuah tikah an fanu te cuarpar tan dingah an ram va tlawn dingin vanlawng lehhmah (tickets) 4 an cawkmi cu an theih hna caah Australia nawlngeitu hna nih ram chungin chuaknak nawl an pe hna lo.

DM