Israel: Africa Mipeem, Thla 3 Chungah Kan Ram Nan Chuahtak Dih Lai

Israel ram chungah Africa rammi mipeem pawl hna hi a thong thongin an rak um ve. Cucaah Israel cozah nawlngeitu hna nih phung ning loin an ram chungah a rak lut/peemmi Africa rammi pawl hna cu thla 3 chungah Israel ram chuahtak dih dingin Cawnnihnih ni ah theihternak an tuah hna.

“Thla 3 chung caan kan in pek hna, hi chung i kan ram nan chuahtak duh lo a si ahcun thong thlak nan si lai tiah an ti hna.”

Africa ram in Sudan le Eritrea ram miphun pawl hna cu an ram uknak a t’hat lo caah an ram chuahtak in dornak kawl awkah Israel ram tiang an rak phan ve.

Israel ram le Egypt ramri khamnak hau hruang an rak bunh hlan a si caah mah ralzam mipeem pawl hna cu phung ning loin Israel ram chungah an rak luh khawhnak hi a si.

A si nain, mipeem kongah tuanvo latu a simi hna nih Israel cozah nawl chuahmi cu an soisel ngai hna. “Ralzam pawl ca i t’ihnung a simi nunnak ah an chiah hna,” tiah an ti.

Israel Immigration nawl ngeitu hna nih mah Africa ralzam tampi hna nih hin kan ram cozah uknak buai ruangah ral kan zammi si tiah an ti ko lai, nain anmah cu sifah ruang i mah ram chuahtakmi tu an si. Cun Judahmi kan zatlang nunphung ca zongah t’ihnung an si tiah an langhter.

A si nain, mah phung ning lo a simi ralzam mipeem pawl hna nih March thla dih hlan chungah kan ram an chuahtak ding a si ahcun phaisa $3,500 le vanlawng ticket man kan pek hna lai tiah nawlngeitu hna nih an langhter.

VOA

Comments are closed.