Niger Ram Ah ISIS Ralhrang Nih US Ralkap Minung 4 An Thah Hna

Nitlaklei Africa, Niger ram ah thlahmi Green Beret Team timi US ralkapbu hna cu ISIS ralhrang pawl nih an irelh lo lioah an nam hna i an kah hna caah US ralkap minung 4 le Nigerien ralkap minung 5 nunnak a liam. Cun hliamhma a pumi minung 2 an si tiah CNN nih a langhter.

US ralkap minung 12 bu le Nigerien ralkapbu minung 30 hna cu hmun khat ah fonh in Oct 3 ah khan nawl thar an rak don caah Meng 53 hrawng a sinak Niamey khualipi ah ral ngiatthlainak an rak tuah.

Nawl thar chuah an donmi ah hmuitinh a simi cu  ISIS ralhrang hruaitu thah khawh asiloah tlaih khawh kha a si tiah ABC News nih a langhter.

A si nain, suimilam 24 chung deng ISIS ralhrang umnak le an hruaitu cu thah ding asiloah tlaih dingin an kawl ko nain an hmu kho hna. Hmui an tinhnak hmun ah khan ralhrang pawl cu an rak um lo.

A thaizing Oct 4 ah an umnak hmun lei panh in US ralkap bu le Nigerien ralkap pawl cu an kir than lio khuate pakhat ah Nigerien ralkap pawl nih an herhmi thil tete hna kha an tuah pah.

Mah karlak caan chungte ahcun US ralkap bu hna le khuate upa hruaitu pawl hna cu panhzai ngaiin biaruahnak an rak ngei. Mah khuate hruaitu upa pawl hna nihcun khua in chuak rih hlah uh tiah an kan ti ko tiah Ralhrang kahnak in a luatmi US ralkap pakhat nih a chim. A si nain, mah hna khuate lak ahhin ISIS ralhrang tanhtu a simi an um i a thli in thawng an rak thanh hna caah si lai tiah an zumh.

US le Nigerien ralkap pawl hna cu mah khuate an chuaktak tlawmpal ah ISIS ralhrang pawl nih an i relh loin rawket garnet bom le machine meithal pawl hmang in mawtaw pawl cung cun zinglei suimilam 11 Am hrawngah an vun kah thluahmah hna.

US le Nigerien ralkap pawl nihcun an kah ve ko hna nain ISIS ralhrang pawl cu an minung zong an tam deuh pinah hriamnam an hmanmi zong a tam deuh caah an doh kho hna lo. Cucaah suimilam pakhat a rauh hnu ah vanlei raltuknak bawmh an hal hi a si.

Suimilam pakhat a rauh hnu ah khin French Mirage jets tu an rak phan i a dang taangmi cu an khamh khawh than hna. Lamhla piin US drone vanlawng cu minute zeimawzat ah a rak phan ko nain a i kahnak lawng kha video a thlak hna. A ruang cu Niger ram ah US drone vanlawng nih ke raltuknak ah bawmh khawhnak nawl a ngeih lo caah a si tiah US ralbawi Joseph Dunford nih a chim.

Ralhrang kahnak in a thimi US ralkap pawl hna i an min cu Bryan C. Black, Jeremiah W. Johnson, Dustin M. Wright le La David Johnson. An dihlak in sen 3 (Sergeant) lawngte an si hna.

Mail Online/CNN