Valentine Day: US, Florida Sianginn Pakhat Ah Minung 17 Thahnawnnak A Cang

US ram caah cun puai, ni sunglawi tibantuk a um caan paoh ah thahnawnnak fak a cang deuh theu tawn ko rua.“Valentine Day,” Feb 14, zanlei suimilam 2:30pm ah US ram, Florida peng, Parkland um, Stoneman Douglas High School timi sianginn chungah minung pakhat nih meithal he a luhhnawh hna i thahnawnnak a tuah caah minung 17 nunnak a liam.

Cun a dang minung 14 zong hliamhma an tuar caah Broward Health Hospitals ah thlopbulnak an tuah hna. Minung 5 hna cu an tuar hma a fak tuk caah an nunnak tiang a liam kho tiah zahan, Cawnnithum ni zan (Feb 14) ah Broward palik zung nih an langhter.

Mah bantukin siangakchia minung 3,000 nak tam an kainak sianginn ah thahnawnnak a tuahtu pate hi kum 19 tlangval note a si. A min ah Nikolas Cruz a si. AR-15 riffle timi meithal he sianginn chungah cun a lunhnawh hna i thahnawnnak a tuah hnu ah Cruz cu palik nih an tlaih khawh than.

Nikolas Cruz cu amah zong hi mah sianginn “Stoneman Douglas High School,” ahhin a rak kai ve balmi a si. Sianginn zulh phung a buar ruangah sianginn in an rak phuah tiah palik bawi pakhat nih a chim.

https://www.facebook.com/ABCNews/videos/10156909053568812/

Abc News