Zisuh Khamhnak Vel Cu Iran Miphun Pa Le Chungkhar Cungah A Tlung Ve

Keimah cu Muslim ka rak si, Zisuh cu profet pakhat bantuk men ah ka rak ruah. Kum 25 ka rak si lioah mawtaw eksident ka rak tong i mithi bantukin ka rak um. Cu lioah cun mang manh bantuk khin a nakmi thil le a raangmi, a cer/ceumi thil ka hmuh hna.

Mah cu caan cu zeitluk canrau a si ka hngal lo nain eksident ka tonmi kha lenglei in keimah le keimah ka zohmi bantuk khin ka um. Cu lioah cun thilnak aa hrukmi nih keimah lei panh in a rak rat caah ka tih i thinpang in ka um. A si nain, a raangmi ceunak bantukin ka lei ah a rakmi pakhat a um ve caah ka hna a ngam than i mah caan cu ceunak he cun dih seh ti kha ka duh deuh.

Mawtaw chung i ka mipum pawng ah ka naupa nih a ka ttah le a ka auh len ko cu ka zoh lioah ceunak cu ka pawngah a rak phan. Cun ka thlarau cu ka mipum chungah a lut than hnu ah ka mit cu an i au, ka naupa nih si-in ah kan kalpi lai i na dam ko lai tiah a ka ti.

Ceunak sinin aw-thawng ka theih nain a sullam le aho aw si kha ka rak thei kho lo. Zisuh auhnak aw-thawng a rak si zong kha ruah awk ka rak hngal lo i Zisuh nih ka nunnak a rak ka khamhmi a si zong kha ka rak hngal lo.

Mah hnu ah Baibal ca ka tlaih, Zisuh kong thlakmi film/video ka zoh. A luan ciami kum 27 chung vialte Allah pathian cu ka rak kawh peng nain a ka lehmi a um ka hngal lo.

A si nain, Zisuh sin i ka hal ahcun a ka leh colh. Mang tampi ka manh, ka mang ahcun Zisuh cu aa langhter lengmang mang caah ka hngalhnak zong a fian deuhdeuh caah ka zumh deuh deuh ve.

Zisuh nihcun a thawhthannak le vancung Pa sin a kai thannak vialte a ka hmuhsak dih i cawnpiaktu saya bantukin Baibal ca chung ummi a ka hmuhsak hna. Ka caah hngalh a harmi thil hna kha Pathian nih Zisuh hmangin ka mang ahcun a ka cawnpiak hna caah zumtu tha ah ka cang.

Zu ding le rithaisi hman a hmangmi ka rak si ko nain Zisuh nih ka nunnak a ka khamh hnu cun mah bantuk rithainak si pawl hna cu ka takpum nih a cohlang duh ti hna lo caah keimah le keimah cu a za long ngaimi le umsia rem ngaimi bantuk khin ka um.

Ka umtuning aa thlen tuk kha ka chungkhar hna nih an hmuh tikah an khuaruah a har i zeicahdah mah tluk in a nunnak hi aa thlen hnga tiah anmah le anmah bia an i hal hna.

Cun ka naupa cu Biakinn ah ka kalpi lengmang ve i zumtu ah a cang ve. Cu hnu ah a dang a tangmi ka chungkhar vialte hna zong zumtu Khrihfa ah a cang dih than ve.

Faith Trend

Comments are closed.